Афғонистон президенти Ашраф Ғани Остонада бўлиб ўтадиган Шанхай ҳамкорлик ташкилоти ва Ислом ҳамкорлик ташкилотининг фан ва технологиялар саммитларида иштирок этади. Бу ҳақда Қозоғистон президенти матбуот хизмати маълум қилди.  

6 март куни Ғани Қозоғистон президенти Нурсултон Назарбоев билан телефон орқали мулоқот қилган. Остонадаги ШҲТ саммити 8-9 июнь кунлари,  Ислом ҳамкорлик ташкилоти саммити эса 10-11 сентябрда ўтказилади.

Афғонистон президенти бу саммитларда иштирок этишини тасдиқлаган.

Томонлар мулоқот давомида икки томонлама муносабатларнинг жорий ҳолати ва истиқболларини муҳокама қилишган. Етакчилар Афғонистон президентининг 2015 йил ноябрда Қозоғистонга ташрифи натижаларига кўра эришилган келишувларнинг амалга оширилишидан қониқиш билдиришган.

Шунингдек, икки давлат етакчиси Қозоғистон ва Афғонистон ўртасида ўрнатилган дипломатик муносабатларнинг 25 йиллиги билан бир-бирларини табриклашган.  

Айни вақтда ШҲТга Ўзбекистон, Қозоғистон, Россия, Хитой, Қирғизистон ва Тожикистон киради. 2016 йилда Ўзбекистонда ўтган саммитда ташкилотга Ҳиндистон ва Покистоннинг киритилиши бўйича меморандум имзоланган. Афғонистон айни вақтда ШҲТда кузатувчи давлат ҳисобланади.