Ўзбекистон Республикаси Эркин иқтисодий зоналарида импорт ўрнини босувчи ва экспортга мўлжалланган маҳсулотларни ишлаб чиқариш кенгайтирилади. Бу ҳақда Ўзбекистон Республикаси Вазирлар Маҳкамасининг “Ўзбекистон республикасининг эркин иқтисодий зоналарида импорт ўрнини қоплайдиган ва экспортга мўлжалланган маҳсулотлар ишлаб чиқаришни янада кенгайтириш чора-тадбирлари тўғрисида”ги 2017 йил 27 февралда қабул қилган қарорида сўз юритилган. 2017-2019 йилларда ЭИЗларда ишлаб чиқариш режалаштирилган маҳсулотлар рўйхати ҳам қарор билан тасдиқланган. Ҳужжат матни Lex.uz сайтига жойлаштирилган

Мазкур қарорни ҳаётга татбиқ этиш маҳсулотлар импортини қисқартириш, экспортга мўлжалланган маҳсулотларни ишлаб чиқиш, уларда тижорат банклари кредитларидан фойдаланиш, минтақалар, соҳа ташкилотлари ва хўжалик бирлашмалари минерал-хом ашё салоҳиятидан имкон қадар кенг фойдаланиш ҳамда ЭИЗлар ҳудудларида тадбиркорлик субъектлари фаолияти учун қулай шароитлар барпо қилиш имконини беради. 

Рўйхатга киритилган лойиҳаларни ўз вақтида тайёрлаш ва амалга ошириш Бошқарув кенгашига юклатилган. Айни кенгашга рўйхатга ўзгартиш киритишга рухсат берилган. 

Тижорат банкларига ўз маблағлари ва Ўзбекистон ҳукумати кафолатисиз жалб қилинган хорижий кредит линияларидан фойдаланган ҳолда ЭИЗларда лойиҳаларни амалга ошираётган тадбиркорлик субъектларига асбоб-ускуналар, хом ашё, материаллар ва бутловчи қисмларни харид қилишлари учун кредитлар тақдим этиш тавсия қилинган. 

Бундан ташқари, 8та тижорат банклари ЭИЗлар ҳудудида ўз шохобчаларини очади.