Қирғизистон соғлиқни сақлаш вазири Талантбек Ботиралиев шифокорлар томондан саргардон қилинган ҳомиладор аёлга шахсан ўзи ёрдам бергани туғруқхонага етиб келган. Бу ҳақда "Кабарлар" ахборот агентлигига Бишкекдаги 4-сонли туғруқхонада бўлганлар маълум қилишган. Гувоҳларнинг айтишича, Сокулук туманидаги ҳомиладор аёлни Бишкекдаги туғруқхоналар пропискаси бўлмагани учун бир сутка давомида қабул қилмай, саргардон қилишган. 

Аёлнинг қабул қилинмаётгани ҳақида ижтимоий тармоқ орқали унинг таниши хабар берган. "Қизлар кечирасиз бундай кечки вақт мурожаат қилаётганим учун. Менинг бир танишим эгизакларга бўйида. Унга кесарча операция қилиниши айтилган. Аёл пули йўқлиги учун туғруқхонага боролмаяпти. Уч боласи билан эри ташлаб кетган. Бугун борса гемоглабини 60 чиққан. Туғруқхоналар олмаётган экан. Халойиқ ёрдам беринглар" деб ёзган аёл.

Унинг бу хабарига бир аёл хайрихоҳлик билдириб, Ботиралиев билан боғланганини ва вазир бу вазиятни ўз назоратига олгани ҳамда аёлни 4-туғруқхона қабул қилишига кўрсатма берганини, барча ёрдам кўрсатилишини маълум қилган.