Ливиянинг пойтахти Триполи соҳиллари яқинида Европага ноқонуний тарзда ўтмоқчи бўлган 20 нафар муҳожирнинг жасади аниқланди, деб маълум қилди "Анадолу" ахборот агентлигига Ливиянинг Сабрат шаҳри ноқонуний миграцияга қарши кураш бошқармаси бошлиғи Басим Ал-Гараблий.

Унинг айтишича, қочқинлар соҳилбўйи хизмати ходимлари ва одамлар контрабандаси билан шуғулланувчи кимсалар ўртасидаги отишмада ҳалок бўлганлар.

Ал-Гараблийнинг айтишича, муҳожирларни олиб кетаётган кемада 160 киши бўлган, бироқ улардан фақат 20 нафарининг жасади аниқланган.

Ал-Гараблийнинг таъкидлашича, бедарак йўқолган деб ҳисобланаётган қолганлар ҳам ҳалок бўлганларига асослар бор.

2016 йилда Ливиядан Италияга Ўрта ер денгизи орқали 181405 муҳожир ўтган. 5 мингдан кўпроқ қочқин йўлда ҳалок бўлган.