17 февраль куни Тожикистоннинг Душанбе-Хўжанд автотрассасида рўй берган қор кўчкиси туфайли бедарак йўқолган деб ҳисобланган икки кишининг жасади топилди.

"Бахтиер Амиров Душанбе-Хўжанд трассасида ҳаракатланиш вақтида қор кўчкиси остида қолган, у ва унинг ҳамкасби жасадлари автотрассанинг 49 километрида топилди", — деган РИА Новости манбаси.

Душанбе-Хўжанд йўли 17-18 февраль кунларида рўй берган ҳалокатдан кейин деярли ёпиб қўйилган. Куннинг маълум вақтларидагина унда ҳаракатланишга рухсат берилган. 28 январдан 25 февралга қадар мамлакатнинг тоғли ҳудудларида 100 мартадан кўп қор кўчкилари кузатилди, бу табиий офатлар оқибатида қурбон бўлганлар сони 20 нафардан ортиқни ташкил қилди.

Эслатиб ўтамиз, бугун Ўзбекистон Тожикистоннинг қор кўчкиларидан жабрланган аҳолисига 60 тонна миқдорида инсонпарварлик ёрдамини жўнатди.