Олий даражадаги Туркманистон-Ўзбекистон музокаралари якунлари бўйича икки томонлама ҳужжатларни имзолаш маросими якунига етгач, Туркманистон Президенти Гурбангули Бердимухамедов ва Ўзбекистон Президенти Шавкат Мирзиёев оммавий ахборот воситалари аъзоларига мурожаат билан чиқиш қилдилар. Бу ҳақда Туркманистон давлат ахборот агентлиги хабар берди.

Давлат раҳбарлари музокараларда муҳим ўрин тинчлик, барқарорлик ва хавфсизликни мустаҳкамлашга қаратилганини таъкидлашди. Томонлар халқаро терроризм, экстремизм, трансмиллий уюшган жиноятчилик, наркотик моддаларнинг ноқонуний айланишига қарши кураш каби долзарб масалаларни ҳал этишда икки томонлама ва халқаро ташкилотлар доирасида биргаликда яқиндан ишлашга келишиб олганликлари таъкидланди.

Марказий Осиёда тинчлик ва хавфсизликни мустаҳкамлашда мамлакатларимиз позицияси ўзгармайди: биз минтақанинг барқарор ривожланишини таъминлайдиган кучли ва самарали механизмларни яратиш тарафдоримиз, дея таъкидлаб ўтди Гурбангули Бердимухамедов.

Афғонистон муаммосига ёндашувда ўхшашлик борлиги таъкидланди, туркман ва ўзбек томони қўшни мамлакатдаги вазиятни ҳал этишга фақатгина тинч, сиёсий йўллар билан, миллий мулоқот асосида эришиш мумкин, деган фикрда. Туркманистон ва Ўзбекистон афғон ҳукуматига фаол халқаро ёрдам бериш, Афғонистоннинг минтақавий ва халқаро иқтисодий жараёнлар интеграциясига кўмак бериш тарафдори.