АҚШ Жанубий Корея ҳудудида ракеталарга қарши мудофаа тизими THAAD’ни жойлаштириш дастурини амалга оширишни бошлади. Бу ҳақда 7 март куни АҚШнинг Тинч океани қўмондонлиги маълум қилди. 

"Шимолий Корея томондан давом этиб келаётган иғвогар ҳаракатлар, жумладан кечаги ракеталар учирилиши, альянсимизнинг Жанубий Кореяда THAAD’ни ўрнатиш бўйича ўтган йилги қарори фақатгина тўғри эканлигини яна бир маротаба тасдиқлади", деб айтилган қўмондонлик баёнотида.

Журналистларнинг маълум қилишларича, РҚМ тизимининг батарея компонентлари АҚШнинг ҳарбий-транспорт самолёти С-17 билан Жанубий Кореядаги Осана ҳарбий базасига етказилган.

Шимолий Корея томонидан ракета хавфларига қарши туриш учун THAAD тизимининг Жанубий Кореяда жойлаштирилиши бўйича келишувларга ўтган йили эришилганди. 

Хитой АҚШ РҚМ тизимларининг Корея яриморолида жойлаштирилишига қатъий қарши чиқмоқда. Пекиннинг фикрича, бу минтақадаги кучларнинг стратегик мувозанатини издан чиқаради.

Аввалроқ Жанубий Корея THAAD тизимларини жойлаштириш учун гольф-клуб майдонини ажратгани маълум қилинганди. Бу майдон денгиз сатҳидан 600 метрдан баландроқда жойлашган.