Филиппин парламентининг вакиллар палатаси мамлакатда наркотиклар билан боғлиқ жиноятлар учун олий жазо сифатида ўлим жазосини тиклаш ҳақидаги қонун лойиҳасини қабул қилди. Бу ҳақда Синьхуа агентлиги хабар берди.

Парламентнинг қуйи палатасида бўлиб ўтган овоз бериш жараёнида наркотик моддалар савдоси ёки унинг айланиши билан боғлиқ жиноятлар учун жазо тариқасида ўлим жазоси ёки умрбод озодликдан маҳрум этишни кўзда тутувчи қонун лойиҳаси маъқулланди. Ҳужжат лойиҳаси 216 депутат томонидан қўллаб-қувватланди, 54 киши қарши чиққан, бир депутат бетараф қолди.

Аввалига қонун лойиҳаси олий жазони бир қатор жиноятлар учун қўллашни кўзда тутганди. Уларнинг орасида босқинчилик, зўрлаш, давлатга хиёнат кабилар бор эди. Бироқ кейинчалик қонунчиликка зид ҳаракатлар миқдори бир неча бор камайтирилди. Натижада ҳужжатнинг якуний матнида фақатгина гиёҳванд моддалар билан у ёки бу жиҳатдан боғлиқ бўлган жиноятлар қолди, деб таъкидлайди Синьхуа.

Филиппин президенти Родриго Дутерте амалдаги жиноий қонунчиликни кучайтириш ва ўлим жазосини тиклаш кераклиги ҳақида маълум қилди. Унинг фикрича, бу оғир жиноятларни олдини олишга йўналтирилган самарали чорадир. 

Кутилишича, қонун лойиҳаси яқин орада Филиппин парламенти юқори палатасига кўриб чиқиш учун юборилади. Сенат уни тасдиқласа, президент ҳужжатга имзо чекиши лозим бўлади, ҳамда шундан сўнг у қонун мақомига эга бўлади.

Филиппинда ўлим жазоси 1987 йилги конституцияга мувофиқ бекор қилинганди. Ўшанда мамлакат ўта оғир жиноятлар учун бундай жазо чорасини бекор қилган биринчи Осиё давлатига айланди. Барча ўлим жазолари умрбод қамоққа алмаштирилган.