Малайзия бош вазири Нажиб Раззоқ Шимолий Корея ҳукуматидан ўз мамлакати фуқароларини дарҳол озод этишни талаб қилгани ҳақида хабар бергандик.

«Бу разил актдир. Унга кўра, бизнинг фуқаролар асирликда сақланмоқда, барча халқаро ҳуқуқ ва дипломатик нормаларга умуман амал қилинмаяпти», - деди Раззоқ. Унинг қўшимча қилишича, Малайзия хавфсизлик кенгашининг фавқулодда йиғилишини чақирган.

Бундан ташқари, бош вазир полицияга КХДР фуқароларини Малайзиядан чиқармаслик ҳақида кўрсатма берган.

Аввалроқ Малайзия ҳукумати Шимолий Кореянинг Куала-Лумпурдаги элчихонасини ўраб олганди. «Биз бу ерда бўлган дипломатик миссиянинг барча ходимлари шахсини аниқлашга ҳаракат қилмоқдамиз», - дея аниқлик киритиб ўтган мамлакат ички ишлар вазири ўринбосари Нур Жазлон Муҳаммад. 

7 март куни Шимолий Корея ҳукумати Малайзия элчихонаси ходимларининг мамлакатдан чиқишига тақиқ қўйгани ҳақида хабар қилинганди. Аниқлаштирилишича, тақиқ «КХДР фуқаросининг Малайзияда ҳалок бўлиши иши юзасидан адолатли қарор қабул қилинмагунга қадар» амал қилади.

4 март куни эса Малайзия ҳукумати КХДРнинг Куала-Лумпурдаги элчиси Кан Чхолни нон грата шахси, деб эълон қилди ва ундан 48 соат давомида мамлакатдан чиқиб кетишни талаб этди.

13 февраль куни Куала-Лумпур аэропортида икки аёлнинг ҳужумидан сўнг эркак ҳаётдан кўз юмди. Малайзия ҳукумати ҳалок бўлган шахс КХДР етакчиси Ким Чен Иннинг акаси Ким Чен Нам эканини тасдиқлади. Ким Чен Намнинг юзидан экспертлар VX асаб-фалажловчи заҳарли модда изларини топишди.