КХДРнинг собиқ етакчиси Ким Чен Ирнинг набираси АҚШ ва Хитой ёрдамида Нидерландиядан бошпана олган. Бу унинг отаси – Ким Чен Нам Куала-Лумпур аэропортида ўлдирилганидан сўнг юз берган, дея хабар берди РИА Новости Жанубий Кореянинг қирол Сежон номидаги институти эксперти Чон Сон Чанга асосан.

Аввалроқ интернетда ўзини Ким Хан Соль деб таништирган ёш йигит видеомурожаати пайдо бўлгани ҳақида хабар бергандик. У кадрларда ўзига тегишли бўлган Шимолий Корея паспортини кўрсатган ва отаси “бир неча кун аввал” ўлдирилганини маълум қилган.

Видео шу пайтга қадар номаълум бўлиб келган “Чхоллим фуқаролик мудофааси” ташкилоти томонидан тармоққа жойлаштирилди – у ўз сайтида Ким Хан Солнинг ҳимояси учун Нидерландия, Хитой ва АҚШга миннатдорчилик билдирган.

“Нидерландия ҳукумати Ким Хан Соль оиласининг Франциядан иммиграциясига рози бўлди”, - дея таъкидлаб ўтди Чон Сон Чан.

Унинг сўзларига кўра, Нидерландия ҳукумати марҳум Ким Чен Намнинг ўғлига бошпана тақдим этиш ҳақида қарор қабул қилган, Хитой ҳукумати эса бу оиланинг мамлакатдан яширинча чиқиб кетиши бўйича чораларни кўрган, АҚШ ҳукумати бошпанага қадар бўлган йўлда уларнинг хавфсизлигини таъминлашга ёрдам кўрсатган.

Ким Чен Намга ҳужум Малайзияда, 13 февраль куни амалга оширилди, бироқ видео энди эълон қилинди. Эҳтимол бу унинг оиласи хавфсиз жойдан паноҳ топганидан сўнг рўй берди. Ҳозирча Ким Чен Намнинг биронта қариндоши ҳам Куала-Лумпурга марҳум шахсини тасдиқлаш ва ДНК молекулалари таҳлили учун келмади. Малайзия ҳукумати Ким Чен Намнинг ўлдирилишида КХДР фуқароларини гумон қилмоқда.