"Ла-ла-лэнд" фильмида бош ролни ижро этган америкалик актёр Райан Гослингнинг қиёфадоши Германиядаги "Олтин камера" (Golden Camera Awards) киномукофотида актёр ўрнига мукофот олди, деб хабар бермоқда People нашри.

Мукофот "Ла-ла-лэнд" фильми учун берилганди. Бироқ кейин аниқланишича, ушбу ҳолат немис комиклари Йоахим Винтершейд ва Клаас Хойфер-Умлауф томонидан уюштирилган ҳазил бўлган. Улар сохта агентлик ташкил қилиб, бу агентлик номидан мукофот продюсерларига тақдимот маросимига Гослингни таклиф қилишга ваъда беришган. Улар мукофот ташкилотчиларини актёр "ижтимоий хавотир касалидан азият чекиши" сабабли қизил гиламчадан ўтмаслиги ва залда ўтирмаслигига кўндира олишган.

Маросим вақтида бошловчи Гослингни ўзига тегишли мукофотни олишга чақирганда, саҳнага актёр ўрнига унинг қиёфадоши – Мюнхенда ошпаз бўлиб ишлайдиган Людвиг Ленер чиққан. У ўз миннатдорчилик нутқида мукофотини комикларга бағишлашини айтиб, тезда саҳнани тарк этган.

Пранкерлар томонидан бу ҳолат акс этган видеоёзувда маросимга келган одамлар, жумладан у ерда бўлган америкалик актёрлар Жейн Фонда, Николь Кидман ва Коллин Фаррелл бу ҳолатдан саросимага тушиб қолишганини кўриш мумкин. Бироқ бошловчи бу ҳазил бўлганини айтиб, томошабинлардан узр сўраган.