IBM дунёдаги биринчи ҳаимёнбоп квант компьютери ишлаб чиқаради. Бу компьютер билан булутли хизмат орқали ишлаш мумкин бўлади, деб маълум қилинди IBM’да.

Компания ходимлари IBM Q квант компьютери ҳақида қуйидаги маълумотларни беришди: бу IBM Quantum Experience платформаси негизидаги 5 кубитли қурилма бўлади. У 2016 йил май ойида Йорктаун Хайтсда (АҚШ) ишга туширилганди.

IBM муҳандислари IBM Quantum Experience учун API ишлаб чиқишди, унинг ёрдамида дастурчилар ўз ечимлари ва 5 кубитли квант компьютерлар ўртасида ўзаро алоқа учун интерфейслар қура олишади. Бу API негизида IBM Q компьютери учун шундай ечимлар яратилади. 

IBM режалари орасида IBM Q’нинг квант ҳажмини кейинги 5 йил ичида 50 кубитгача етказиш бор. Бундай тизим барча мавжуд ҳисоблаш қурилмаларини анча орқада қолдиришга имкон беради.

Квант компьютерлари бирор қонуният амал қиладиган катта ҳажмдаги маълумотларни қайта ишлай олади. Мисол учун, бу компьютерлар кимёвий тажрибаларни моделлаштириш ёки моддалар хусусиятини айтиб бера олиши мумкин. Оддий компьютерлар ҳаттоки битта оддий молекуланинг квант ҳолатини моделлаштиришга қодир эмас.  

Бундан ташқари, квант компьютерлари катта лойиҳалар логистикасини ҳисоблаб чиқиш ва энг жадал даврлар учун ҳам етказиб бериш каналларини қуришга қодир. Улар молиявий маълумотларни моделлаштириш ва инвестицион хатарларни ҳисоблаб чиқиш, катта маълумотлар массивида ахборотни, мисол учун фото ёки видео бўйича излашга қодир.