Hyperloop One компанияси дунёдаги энг биринчи Hyperloop транспорт тизимининг тест полигони қурилишига доир бир неча суратларни тақдим этди. Қурилиш ишларига Невада штатида старт берилди. Лос-Анжелес стартапи Илон Маскнинг йўловчи ва юк ташишга мосланган футуристик тизимини ҳақиқатга айлантиришга оид ғоясини қўллаб-қувватлаган компаниялардан бири ҳисобланади. Hi-News шу ҳақида хабар берди.

Концептнинг ўзи "транспортнинг бешинчи авлоди" сифатида эътироф этилмоқда. У ёпиқ капсулаларда соатига 1220 километр тезликда йўловчи ва юк ташиш хизматларини амалга оширади. Ғоя кимгадир "илмий фантастика"дек туюлиши мумкин, бироқ Невададан йўлланган янги суратлар илк Hyperloop тизимининг йўлга қўйилишини узоқ кутмаслигимизга ишора қилмоқда. 

DevLoop номини олган тест полигонининг узунлиги ҳозирча 500 метрни ташкил қилмоқда. Конструкция оғирлиги эса - 1 миллион килограммдан зиёд. Яқин ойларда қурилиш ниҳоясига етгач, линиянинг узунлиги 3 километрга яқинни ташкил қилади. 

Hyperloop тизими концепцияси илк марта 2012 йилда Tesla ва SpaceX асосчиси ҳамда директори Илон Маск томонидан таклиф қилинган. 

Манбага кўра, қувурнинг БААдаги қурилиши 2020 йилга бориб тугалланиши мумкин, бироқ унга қадар аввал ҳозирда Невада чўлида йиғилаётган DevLoop синов тармоғининг тўлиқ кўламли намойишини ўтказиш керак. Лойиҳа муаллифлари мислсиз тезликда ҳаракатланувчи  бундай транспортнинг ҳақиқатда хавфсиз эканига ишонч ҳосил қилишлари керак бўлади. Айнан шунинг учун жорий йилда бор эътибор Невадаги қаратилади.