Украина пойтахти Киев шаҳрида номаълум кимса эркак кишини отиб ўлдирди. Унинг икки фарзанди яраланган, деб хабар қилмоқда Киев миллий полицияси бош бошқармаси вакили Оксана Блищик.

"Пойтахт полицияси эркак киши қотиллигидаги гумондорни қидирмоқда. Киев фуқароси болалари билан автомобилда уйига қайтаётган бўлган. Уйга етиб келишганида номаълум киши "Мерседес"ни ўққа тутган. Эркак киши ҳалок бўлган, болалар шифохонага келтирилган", — деб ёзган Блищик Facebook тармоғидаги саҳифасида.

Таъкидланишича, ҳодиса Киевнинг Голосеев туманида рўй берган. Дастлабки тергов-суриштирув натижаларига кўра, ғаразгўй 6 марта, тахминан Макаров пистолетидан ўқ узган. Полиция етиб келганида болалар машина ичида бўлган. Уларнинг аҳволига ойдинлик киритилмоқда. 

Ҳозирда, қотиллик бўйича жиноий иш қўзғатилган. Марҳум тадбиркорлик билан шуғулланган маҳаллий фуқаро экани аниқланган. Полиция тергов ишларини давом эттирмоқда.