АҚШ сенати халқаро қўмитаси аъзоси, демократ Бен Кардин АҚШ президенти Дональд Трампдан унинг бир неча ўнлаб савдо маркаларининг Хитой ҳукумати томонидан маъқулланиши сабабли Trump Organization компанияси билан барча алоқаларни узишни талаб қилувчи резолюция лойиҳасини кўриб чиқиш учун киритди. Бу ҳақда Reuters ахборот агентлиги хабар бермоқда.  

Сенаторнинг айтишича, акс ҳолда, Трамп конституцияни бузган бўлади. Сенатор давлат департаменти, савдо ва адлия вазирликларидан АҚШ конгрессига хитойликларнинг қарори ва "бу қарор ўзидан қандай хавфлар билдириши" ҳақида сўзлаб беришни сўради.  

Хитой ҳукумати аввалроқ Трампнинг 38 та янги савдо маркасини маъқуллаган. Бу маркаларга аризалар 2016 йил апрелда, яъни Трамп АҚШ президенти этиб сайланишидан бир неча ой олдин топширилган. Гонконглик таҳлилчи Хитой ҳукумати бундай кўп миқдордаги аризани шундай тез маъқуллаганини биринчи марта кўраётганини айтди. 

Трамп ўз бизнесини ўғилларидан бири ва Trump Organization менежери томонидан бошқарилувчи махсус трастга топширган, бироқ унинг ўзи трастнинг ягона бенефициари (даромад олувчиси) бўлиб қолмоқда, яъни у компания фаолиятидан даромад олади ҳамда исталган вақтда бошқарувни ўзига қайтариб олиши мумкин.

Кардин конституция бузилиши деганда, унинг 1-моддасини назарда тутган. Унга кўра, америкалик расмий шахслар конгресс розилигисиз хорижий давлатлардан ҳеч қандай даромад олишга ҳаққи йўқ.