Туркия президенти Ражаб Тойиб Эрдўған Кремлда Путин билан учрашуви якунидаги матбуот анжуманида Россия ва Туркия Су-24 билан боғлиқ муаммоларни ортда қолдиргани ҳақида гапирган.

«Биз ўша воқеа ортидан юзага келган барча иғволи ҳаракатлар ҳамда барча муаммоларни енгиб ўтдик», деган у.

Унинг сўзларига кўра, ўтказилган музокаралар давомида икки давлат барча йўналишлардаги алоқаларни нормаллаштирган.

«Мен ҳисоблайманки, бугун биз алоқаларни нормаллаштириш жараёнини бутунлай якунлаймиз ва бу сўзни бошқа ишлатмаймиз», дея қўшимча қилган Туркия раҳбари.

2015 йилнинг ноябрь ойи охирида Туркиянинг F-16 қирувчиси Сурия осмони устида Россиянинг Су-24 бомбардимончисини уриб туширган эди.

Су-24 самолёти учувчиси капитан Олег Пешков катапультадан кейин тирик қолган бўлсада, Латақия ҳудудидаги туркман жангчилари томонидан осмондалигидаёқ ўққа тутилгач, ҳалок бўлган. Иккинчи учувчи, капитан ёрдамчиси, штурман Константин Мурахтин эса қутқарилган. У Туркия чегараси бузилмаганини таъкидлаган ва турклар томонидан ҳеч қанақа огоҳлантириш сигналлари йўлланмагани ҳақида айтганди. 

Россия президенти Владимир Путин бу ҳаракатга «террорчилар ҳамтовоқлари томонидан орқадан берилган зарба», дея баҳо бериб, Анқарага нисбатан бир қатор иқтисодий чораларни киритган эди. Шундан сўнг ойлар давомида икки мамлакат муносабатлари совуқлашди.

2016 йил июнь ойи охирида Туркия президенти Ражаб Тойиб Эрдўған бўлиб ўтган воқеа учун кечирим сўради  ва муносабатлар илиқлашди.