Ҳиндистон парламентининг қуйи палатаси (Лок сабха) ҳомиладорлик ва туғуруқ таътилини 12 ҳафтадан 26 ҳафтагача узайтириш ҳақида қонун лойиҳасини қабул қилди. Бу ҳақида 10-март куни Hindu нашри хабар берди

Манбага кўра, қонун лойиҳаси куни кеча қабул қилинган. Юқори палата (Ража сабха) уни бир неча ой аввал қўллаб-қувватлаган. У президент Пранаб Кумар Мукержи томонидан тасдиқланганидан кейин қонунга айланади. 

26 ҳафталик (182 кун) ҳомиладорлик ва туғуруқ таътили 10 кишидан ортиқ штатга эга ташкилотларда ишловчи ва фарзанди иккитадан кўп бўлмаган аёлларга тааллуқлидир. Агар кутилаётган бола аёлнинг учинчи фарзанди бўлса, у ҳолда унга аввалги, 12 ҳафталик таътил берилади. 

Қонун бошқа низомларни ҳам киритмоқда: 50 кишидан ортиқ штатга эга ташкилотлар болалар хоналарини ташкиллаштиришлари керак бўлади. 

Жаҳон меҳнат ташкилоти (ЖМТ) стандартларига кўра, аёлларнинг ҳомиладорлик ва туғуруқ таътили 14 ҳафтадан кам бўлмаслиги кераклиги қайд қилинган, шу билан бирга бу муддатнинг камида 18 ҳафта бўлиши тавсия этилади. Ҳиндистоннинг 12 ҳафталик меъёри ЖМТнинг аввалги стандартига мувофиқ келарди, лекин 2000 йилда унинг муддати узайтирилди. Янги қонун туфайли Ҳиндистон бу кўрсаткич бўйича етакчи мамлакатлар қаторига қўшилади.