Ўзбекистон президенти Шавкат Мирзиёев Бухоро вилоятига ташрифи давомида «Бухоро—Мискин» темирйўл қурилишининг бориши билан танишди.

ЎзА хабарида айтилишича, ушбу темирйўл узунлиги 350 километрдан зиёд бўлади. Лойиҳанинг умумий қиймати 283 миллион долларни ташкил этади.

«Бухоро—Мискин» йўналиши бўйича қуриладиган темирйўлда 8 темирйўл станцияси ва разездлар барпо этиш белгиланган.

Президент Бухорода янги «Афросиёб» поезди имкониятлари билан ҳам танишган.

«Ўзбекистон Президенти Шавкат Мирзиёев Бухоро вилоятига ташрифи давомида янги «Афросиёб» электропоездининг имкониятлари, йўловчилар учун яратилган қулайликлар билан танишди.

Янги замонавий электропоезд олдингиларига қараганда кенг имкониятга эга. Хусусан, шу вақтга қадар ҳаракатланаётган юқори тезликдаги электропоездлар 215 йўловчи сиғимига эга бўлиб, иккита VIP, иккита «бизнес» ва иккита «эконом» тоифали вагонлардан иборат. Янги поезд 287 йўловчи сиғимига эга. Унда «эконом» тоифали вагонлар сони иккита кўп.

«Тез кунларда замонавий электропоезднинг иккинчиси ҳам олиб келинади. Поездлар ҳаракатини йўлга қўйиш баробарида қўшимча иш ўринлари яратилиб, 15 машинист ва 50 га яқин вагон кузатувчисини иш билан таъминлаш кўзда тутилган», — дейилган ЎзА хабарида.