Қозоғистоннинг Олмаота шаҳрида 18 ёшли талаба қиз чақалоғини ахлатхона қутисига ташлаб юборди. Эрта тонгда ҳали нафас олаётган чақалоқни ўткинчилар кўриб қолган. Бу ҳолат шаҳардаги олий таълим муассасаларидан бирига тегишли ётоқхонанинг ёнида рўй берган, деб хабар бермоқда Patrul.kz. 

Нашр маълумотига кўра, чақалоқни топиб олган ўткинчи полицияни чақирди ва болани касалхонага олиб кетишган. Чақалоқни кўздан кечирган тиббиёт ходимларининг таъкидлашича, чақалоқнинг киндиги ҳам боғланмаган бўлган.

Бир неча соатдан сўнг полиция ходимлари чақалоқнинг онасини ётоқхона биносидаги хоналардан бирида топишган. Маълум бўлишича, боланинг онаси Қизилўрда вилоятилик бўлиб, Олмаотадаги олий таълим муассасаларидан бирининг икки босқич талабаси экан. У тиббий ёрдамга муҳтож бўлган ва оғир аҳволда шаҳар касалхоналаридан бирига олиб кетилган. Тахминларга кўра, ёш аёл ётоқхона хоналаридан бирида бир ўзи болани дунёга келтирган.

Хабар қилинишича, чақалоқнинг ҳаёти сақлаб қолинмаган. Жуда ҳам кучсизланган бола шифохонага олиб келинганидан бир неча соат ўтиб ҳаётдан кўз юмган.

Нашрнинг таъкидлашича, аёлга нисбатан жиноят иши қўзғатилган, тергов ҳаракатлари олиб борилмоқда.