Президент Масжиди Калон ва Мир Араб мадрасаларини қайта таъмирлаш бўйича кўрсатмалар берди

Ўзбекистон 11 Март 2017 14320
Мир Араб мадрасаси Фото: qadamjo.uz

Истиқлол йилларида Биринчи Президентимиз Ислом Каримов раҳнамолигида миллий ва маънавий қадриятларимизни, тарихий обидаларни тиклаш, уларни асраб-авайлаш борасида кенг кўламли ишлар амалга оширилди. 1997 йил Бухоро шаҳрининг 2500 йиллиги муносабати билан мазкур мажмуа тубдан таъмирланди. Масжиди Калон, Минораи Калон ва Мир Араб мадрасасидан иборат мазкур меъморий ансамбль вилоят аҳолиси ва меҳмонларининг севимли масканларидан биридир, деб ёзади ЎзА агентлиги. 

Давлатимиз раҳбари юртдошларимиз ва мамлакатимизга ташриф буюраётган сайёҳларга янада қулайлик яратиш мақсадида ҳунармандлик расталари, дўконларни қайта қуриш бўйича кўрсатмалар берди. 

Бухоро – ҳайрат ва мўъжизалар макони. Ёдгорликлар халқимиз билан тақдирдош. Уларнинг кўпчилиги собиқ тузум даврида шафқатсизларча харобага айлантирилган. Мустақиллик йилларида ушбу обидалар таъмирланди, яна асл қиёфасида жамол очди. 

Мир Араб мадрасаси 

Икки томонда ҳунармандлик дўконлари жойлашган йўлак бўйлаб борар экан, Президентимиз мазкур йўлакларни кенгайтиришни, дўконларни икки қаватли қилиб қайта қуриш лозимлигини таъкидлади. 

Иккинчи қаватда ҳунарманд усталар яшаса, биринчи қаватда уларнинг дўкон ва устахоналари жойлаштирилса мақсадга мувофиқ бўлади, деди давлатимиз раҳбари. Бу ерда маҳсулотларни тайёрлаш ва сотиш жараёни уйғунлаштирилиши керак. Рубоб тайёрлаётган устани, гилам ёки газлама тўқиётган ҳунармандни иш устида кўрган ҳар қандай одам завқланади. 

Масжиди Калон

Президент ҳунармандлик бозорини тартибга келтиришни, миллий анъаналаримиз акс этган, замонавий расталар қуришни таклиф қилди. 

“Шавкат Мирзиёев Масжиди Калон ва Мир Араб мадрасаларини қайта таъмирлаш бўйича мутассадиларга тегишли кўрсатмалар берди”, - дейилади хабарда. 

Кўпроқ янгиликлар