Бельгиядаги хусусий ҳайвонот боғида каркидонларни браконьерлардан ҳимоя қилиш мақсадида уларнинг шохи кесиб ташланди. Бу ҳақда "Би-би-си" телеканали хабар бермоқда.  

9 март куни браконьерлар Франциядаги ҳайвонот боғига кириб каркидонни ўлдиришгандан кейин, Бельгияда бундай кескин чорага боришга қарор қилинди. Франциядаги воқеада жиноятчилар ҳайвонот боғининг орқа эшиги панжарасини бузиб, учта оқ карқидон сақланган бино ичига кириб, у ердаги битта каркидонни ўлдиришган. Полицияда айтилишича, жиноятчиларга барча каркидонларни ўлдириш учун вақт етмаган ёки уларни кимдир чўчитиб юборган. Таъкидланишича, бундай ҳодиса Европада биринчи марта юз берган. 

Каркидон шохидан олинадиган кукун баъзи давлатларда ажойиб таъсирга эга шифобахш восита ҳисобланади. Бундай кукуннинг бир килограмми 75 минг долларгача туриши мумкин.  

Африкада каркидонларни браконьерлар ҳужумидан ҳимоя қилиш учун кўпинча шохлари кесиб ташланади. Зоологларнинг айтишича, жонзот учун бу жараён оғриқсиз ҳисобланади ва маълум вақтдан кейин шох яна ўсиб чиқади.

Бир қатор давлатларда браконьерларга қарши кескин чоралар кўрилмоқда. Мисол учун, Ҳиндистонда браконьерларнинг ўзи ўққа тутилади.

Браконьерларнинг бундай қабиҳона фаолиятлари сабабли каркидонларнинг баъзи турлари йўқ бўлиб кетиш ёқасига келиб қолган. 2017 йил 6 март кунидаги маълумотларга кўра, дунёда шимолий оқ каркидонларнинг бор-йўғи уч вакили – икки урғочиси ва бир кекса эркаги қолган. Уларнинг атрофида кун бўйи қуролланган махсус кучлар қоровуллик қилади.