АҚШ Давлат департаментининг ҳисоблашича, Жанубий Кореяда THAAD ракетага қарши мудофаа тизими жойлаштирилиши мудофаа характерига эга ҳисобланади ва бу Вашингтон ҳамда Пекин ўртасидаги мулоқотга халақит қилмайди. Бу ҳақда АҚШ Давлат котиби Рекс Тиллерсон 15-19 март кунларида Япония, Жанубий Корея ва Хитой бўйлаб амалга ошириладиган сафари олдидан ўтказилган махсус брифинг чоғида маълум қилган.

"Биз бу масалани (THAAD тизимини жойлаштириш) Хитой билан муҳокама қилишни давом эттирамиз. Улар ҳали вазиятни аниқ англашмаган. Бу бизнинг Шимолий Корея таҳдидига қарши мулоқотимиз йўлида тўсиқ бўлмаслиги керак", деган у.

У THAAD ракетага қарши мудофаа тизими жойлаштирилиши Жанубий Корея хавфсизлигини таъминлашга қаратилганини таъкидлаб, бу тизим Хитой хавфсизлигига таҳдид солмаслигини қўшимча қилган.

Қўшма Штатларнинг Тинч океандаги қуролли кучлари қўмондонлиги 7 март куни Жанубий Корея ҳудудида THAAD ракетага қарши мудофаа тизимини жойлаштиришга киришди ва мазкур тизимнинг дастлабки қисмларини белгиланган манзилга етказди. Тизимлар атмосфера ва унинг ташқарисида кичик ҳамда ўрта масофага учувчи баллистик ракеталарни йўқ қилишга мўлжалланган.

Бу тизимлар жойлаштирилишига Хитой ва Россия томони норозилик билдирди.