Нидерландия бош вазири Марк Рютте Туркия билан дипломатик зиддиятни ҳал этиш учун барча чоралар кўрилишига ваъда берди. Бу ҳақда Reuters агентлиги хабар берган.

«Биз ҳеч қачон бундай вазиятга тушмаган эдик. Аммо бу вазиятда ақл билан иш тутамиз. Агар Туркия вазиятни кескинлаштиришга уринаётган бўлса, биз вазиятни изга солиш устида иш олиб борамиз», — деган у.

Рюттенинг сўзларига кўра, бу ҳолат Нидерландия тарихида рўй берган энг ёмон ҳодисадир.

Бундан олдинроқ Туркия бош вазири Нидерландиянинг «фашистлар» га хос методларига қарши кескин чоралар кўрилишидан огоҳлантирганди.

11 март куни Нидерландия ҳукумати хавфсизлик юзасидан Туркия ташқи ишлар вазири Мавлуд Човушўғли раҳбарлигидаги Туркия делегацияси самолётига қўнишга рухсат бермагач, Фатма Бетул Саян Кая Германиядан машина орқали Нидерландияга йўл олган эди. Човушўғли ва делегациянинг бошқа аъзолари Туркиядаги конституция референдумига бағишланган митингда нутқ сўзлашни режалаштирганди.

Кайя Нидерландияга келганда, бу мамлакатнинг ички ишлар вазирлиги ходимлари Туркиянинг Роттердамдаги бош консуллиги қароргоҳи ёнида унинг автомобили йўлини тўсишди ва у мамлакатдан чиқариб юборилди.