Нидерландияга келган Туркиянинг оила ишлари ва ижтимоий сиёсат бўйича вазири Фатма Бетул Саён Кайянинг автомобили Туркиянинг Роттердамдаги консуллиги биносидан 30 метр нарида тўхтатилиб, консуллик томон ўтказилмаган. Шу сабабли Кайя Нидерландияни инсон ҳуқуқларини бузишда айблади, деб хабар бермоқда Reuters ахборот агентлиги. 

"Нидерландия менга Туркиянинг Роттердамдаги консуллигига киришга йўл бермай, барча халқаро қонунлар, конвенциялар ва инсон ҳуқуқларини бузмоқда", деб ёзган вазир твиттерда. 

Нидерландия полициячилари Кайяни Германия чегарасигача элтиб қўйишга қарор қилишган. Бироқ айни вақтда турк вазири чегарага голланд полицияси ҳамроҳлигисиз йўл олмоқда. Бу ҳақда Роттердам мэри Аҳмад Абутолиб маълум қилди. 

"Вазир Германияга кетмоқда. Унинг ҳамроҳлари ва қўриқчилари ҳам у билан биргалар", деб айтган Абутолиб.

Абутолибнинг айтишича, турк консули Кайянинг келиши ва унинг режалари борасида ҳаммани янглиштирган. "У ёлғон гапирган" деб айтди Абутолиб.

Аввалроқ Нидерландия ҳукумати мамлакатда турк сиёсатчиларининг чиқишларини тақиқлаб қўйганди. Бироқ шунга қарамай, 11 март куни Кайя Германиядан Нидерландияга келган. Бироқ Нидерландия полицияси унга Туркиянинг консуллиги ёнида тўпланган турк жамоасига мурожаат қилишга ҳамда консуллик биносига киришга йўл бермаган. Сўнгра Кайя "номақбул хорижлик" деб аталиб, ортига қайтарилган.