Туркия ташқи ишлар вазирлиги Нидерландия ҳукуматининг турк вазирларига нисбатан таҳқирловчи хатти-ҳаракатлари қораланган ёзма баёнот билан чиқди.

Баёнотда Нидерландия раҳбарияти Туркия ташқи ишлар вазири Мавлуд Човушўғлуга турк жамоаси вакиллари ва турк дипломатлари билан кўришишга рухсат бермагани айтилган.  

"Нидерландия раҳбарияти бошидан дипломатик меъёрларга зид келувчи йўлни намойиш қилганди. Анқара Нидерландия ҳукумати томондан адоватга йўғрилган бундай муносабатни ва нохолис ёндашувни қоралайди ва унинг қарорига норозилик билдиради", дейилган ҳужжатда.

Туркия Нидерландиянинг бу сиёсатига норозилик сифатида айни вақтда таътилда бўлган Нидерландиянинг Туркиядаги элчисига маълум вақтга ўз мажбуриятларини бажаришдан бош тортишни тавсия қилди.

"Туркия ва Нидерландиядаги турк жамоасига қарши қабул қилинган бу даҳшатли қарор икки давлат ўртасидаги дипломатик, сиёсий-иқтисодий ва бошқа соҳалардаги муносабатлар учун жиддий оқибатларга олиб келади. Биз бу ҳақда Нидерландия ҳукуматини огоҳ қилмоқдамиз", деб айтилди хабарда.