Қозоғистоннинг Air Astana авиакомпанияси кетма-кет содир бўлган учта ҳодисани ҳам «тасодиф» деб баҳолади. Бу ҳақда Tengrinews.kz ёзмоқда.

«Уччала ҳодисада ҳам авиация техникаси ишламай қолган. Ҳозирча, ушбу воқеалар бўйича техник ходимлар ёки учувчилар таркиби билан боғлиқ бирорта хато аниқланмаган», – деб ҳикоя қилган компания ходими Сергей Макаренко.

Air Astana компаниясининг бошқа бир вакили Ярослав Толстовнинг қайд этишича, фавқулодда ҳолатлар турли двигателларга эга турли русумдаги самолётларда рўй бергани боис, тизимли хато мавжудлиги ҳақида сўз юритиш нотўғри бўлади. 

Макаренко компаниядаги самолётлар хавфсизлигини «99 ва вергулдан сўнг яна бир нечта 99» фоизга баҳолаган.

«Олмаотага машинада боргандан кўра, ҳаво кемасида бориш хавфсизроқдир», – деган Макаренко. 

Хабарларга кўра, Олмаотадан парвоз қилган Air Astana самолёти навигация қурилмаси ишдан чиққани сабабли аэропортга қайтган. 

Бундан аввалроқ, айни компаниянинг бошқа бир ҳаво кемаси Остона-Олмаота рейсини амалга ошираётган вақтда, экипаж аъзолари чап двигателни ўчиргандан сўнг, фавқулодда қўнишга мажбур бўлган. 

Бу воқеадан бироз муқаддам Олмотадан Уральскка учаётган самолёт Оқтўбеда қўнишга мажбур бўлган эди. Бунга двигателнинг ҳавони тақсимлаш тизимидаги нуқсон сабаб қилиб кўрсатилади.