Европа Иттифоқи Туркияни бу мамлакатнинг Нидерландия билан можаролари фонида вазиятни кескинлаштириши мумкин бўлган «ортиқча баёнотлар» ва ҳаракатлардан тийилишга чақирди.

«Европа Иттифоқи Туркияни вазиятни янада оғирлаштириши мумкин бўлган ортиқча баёнотлар ва ҳаракатлардан тийилишга чақиради», дейилган ЕИ дипломатияси раҳбари Федерики Могерини ва Қўшничилик сиёсати бўйича еврокомиссар Йоханнес Ханнинг қўшма баёнотида.

Баёнотда шунингдек, агар Туркияда 16 апрель кунги референдумдан кейин конституцияга ўзгартиришлар киритилса, Туркия ЕИга киришга номзод ва Европа Кенгаши аъзоси сифатида баҳоланиши ҳақида айтилган.