Бугун, 14 март куни Тошкент шаҳар ҳокимлигида ўтказилган матбуот анжуманида шаҳар ҳокимлиги, шаҳар прокуратураси, ИИББ, Хотин-қизлар қўмитаси, Халқ таълими бошқармаси, Ўрта махсус, касб-ҳунар таълими бошқармаси, "Маҳалла" хайрия жамоат фонди, "Камолот" ЁИҲ шаҳар кенгаши ҳамкорлигида қабул қилинган "2016-2017 йилги ўқув йилида умумтаълим мактаблари, касб-ҳунар коллежлари ва академик лицейларда ўқувчилар давоматини тўлиқ таъминлаш, 9-синф битирувчиларини ўрта махсус, касб-ҳунар таълими муассасаларига ўқишга қамраб олишни амалга оширишга қаратилган қўшимча чора-тадбирлар тўғрисида"ги қўшма қарорнинг мазмун-моҳияти юзасидан батафсил ахборот берилди. 

Тадбирда маълум қилинишича, ўқувчи ўқув машғулотлари вақтида интернет-кафеларида бўлгани аниқланган ҳолатда, унинг ота-онаси мазкур ҳолат юзасидан жавобгарликка тортилади. 

Ўқувчининг ота-онаси энг кам ойлик иш ҳақининг 5 бараваридан 10 бараваригача бўлган миқдорда жарима тўлаши белгиланган.

Жорий йилнинг кейинги 2 ойи давомида Тошкент шаҳар ИИББ ва ПГ ходимлари томонидан шаҳарда вояга етмаганлар ўртасида назоратсизлик ва ҳуқуқбузарликлар профилактикаси тўғрисидаги қонун талаблари ижросини бажариш мақсадида 99 марта 3 босқичли тадбирлар ўтказилган.

Бундай рейдларнинг биринчи босқичида ўқув машғулотлари пайтида дарсга кирмасдан интернет кафеларида мақсадсиз юрган 339 нафар вояга етмаганлар аниқланган. Улардан 112 нафарини мактаб ўқувчилари, 227 нафарини эса лицей ва коллеж ўқувчилари ташкил қилган.