Россия Давлат думасининг мудофаа қўмитаси раҳбари биринчи ўринбосари Андрей Красов россиялик ҳарбийлар Миср ҳудудига жойлаштирилгани ҳақидаги хабарни навбатдаги чўпчак деб атади.

«Бу албатта навбатдаги тўқима гап. Бундай хабар тарқатишдан мақсад вазиятни таранглаштиришга эришишдир. Биз ўз ҳаракатларимизни оқибатни ўйлаган ҳолда амалга оширамиз ва биз ҳеч кимдан ҳеч нарсани яширмасдан ҳаракатланамиз. Биз ўз ҳаракатларимизни алоқадор давлат билан келишган ҳолда амалга оширамиз», — дея Красовнинг сўзларини келтирган РИА Новости.

У Россиянинг Суриядаги муваффақиятлари кимлардадир «Москвани яккалаб қўйиш» ниятини туғдиргани ҳақида айтиб ўтган.

«Мен ғарблик ҳамкасбларимиздан ҳамма жойдан Россиянинг изини қидиришни бас қилишни сўрардим. Улар ажойиб давлатни вайрон қилишди ва ўрнига янгисини тузишмади», — дея қўшимча қилган у.

Бундан олдинроқ россиялик ҳарбийлар гуруҳи Миср ва Ливия чегараси яқинига келтирилгани, бу гуруҳ Ливиядаги радикал кучларга қарши кураш олиб бораётган Халифа Хафтар гуруҳига қурол-яроғ етказиб берилишини таъминлаш учун жойлаштирилгани ҳақида хабар пайдо бўлганди.