Бугун, 14 март куни Қозоғистон Республикаси (ҚР) ҳукумат мажлисида "ҚРнинг ижтимоий таъминот масалалари бўйича баъзи қонунчилик ҳужжатларига ўзгартириш ва тузатишлар киритиш тўғрисида"ги қонун лойиҳаси тасдиқланди. Бу ҳақида ҚР Меҳнат ва аҳолини ижтимоий ҳимоя қилиш вазирлигининг матбуот хизматига таяниб, Zakon.kz хабар берди. 

Юқорида  қайд этилган қонун лойиҳаси қуйидагиларни кўзда тутади:

- 2017 йилнинг 1 июлидан пенсиялар миқдори 2016 йилги кўрсаткичга нисбатан 20 фоизгача ошади;

- бола туғилиши муносабати билан бериладиган бир марталик нафақа тўлови 2017 йилнинг 1 июлидан 20 фоизга ошади.

Умумий пенсия миқдори йил бошида 9 фоизга ошгани инобатга олингани ҳолда 11 фоизга оширилади. Таянч пенсиялари миқдори йил бошида 7 фоизга ошгани ҳисобга олингани ҳолда, 13 фоизга оширилади. Шу тариқа, 2017 йилнинг 1 июлидан пенсиялар миқдорининг оширилиши 2016 йилга нисбатан 20 фоизга таъминланади. Бу Қозоғистондаги барча нафақахўрлар ёки 2 миллиондан зиёд кишини ўз ичига қамраб олади. 

Хусусан, 2017 йилнинг 1 январидан пенсиянинг минимал миқдори 40 950 тенгени ташкил қилган бўлса, шу йилнинг 1 июлидан бу кўрсаткич 45 711 тенгени қайд этади. Пенсиянинг ўртача миқдори 60 167 тенгедан 66 676 тенгега кўтарилади.