Одамлар борки, улар ҳақида гапириш эмас, ҳатто эслаш ҳам хуш келмайди. Одамлар борки улар ҳақида гапирганда вақт ўз аҳамиятини йўқотади. Чунки бундай зотлар ҳақида йиллар, асрлар мобайнида гапириб келинади. Уларнинг қилган ишлари, гўзал хислатлари, ўрнак бўлгудек ахлоқлари авлодларга етказилади. Ана шундай зотлардан бири Шайх Муҳаммад Содиқ Муҳаммад Юсуф ҳазратлари эди. 

Kun.uz ҳазратнинг иниси, Муҳаммад Амин Муҳаммад Юсуф билан суҳбат уюштирди. Мазкур суҳбат давомида ҳазратнинг болалик давридан тортиб, илм йўлида қилган ишларига қадар бўлган умр йўли тилга олинди.

Болалик хотиралари

“Бир сафар хўрозқанд олганимизда у киши менга энг каттаси бериб, ўзлари энг кичигини олган эдилар. Бунинг боисини сўраганимда кейинчалик бунга даъво қилмаслигинг учун, деб изоҳ берган эдилар. У киши мени акам бўлишлари билан бирга ҳар соҳада устозим ҳам бўлганлар”.

Оила масаласи

“Ҳазрат оила масаласига жуда эътибор қаратганлар. Чунки ўзбек халқи оила деган тушунчага жиддий эътибор қаратади. Шу сабаб у киши бу мавзуда жуда кўплаб китоблар ёзиб қолдирганлар. Энг муҳими оила масаласидаги қарашларини ўз оилаларидан бошлаганлар. Бунинг меваси ўлароқ, бугунги кунга келиб, у зотнинг фарзандлари оталари томонидан халққа, ватанга, динга қилган хайрли ишларини муносиб давом эттирмоқдалар”.

Спорт билан ҳамнафаслик

“Ҳазрат спортни жуда севардилар. Болаликларида рус тилидан иншо олишганида у киши “Пахтакор” стадионига қоровул бўламан”, деган мазмунда ижодий иш ёзганлар. Бунинг сабабини сўрашганида: “Маза қилиб футбол кўриш учун”, деб жавоб қайтарганлар. Умрларининг сўнгига қадар спорт билан ҳамнафас бўлиб яшадилар. Ҳатто, тақдир экан, спорт залида жон бердилар”.

Муҳаммад Амин Муҳаммад Юсуф билан кечган суҳбатимиз жуда мароқли бўлди. У киши акалари ҳақида чиройли хотираларни ёдга олдиларки, кўриб киши ҳавас қилади. Мазкур суҳбатни сайтимизнинг YouTube каналида томоша қилишингиз мумкин.

Видео: Tas-IX

Видео: YouTube