Хитой Американинг THAAD РҚМ тизимларини Жанубий Кореяда жойлаштирилишига қарши чоралар кўра олмаслигига кўзи етганидан сўнг, бошқа тадбирларни кўра бошлади. Хусусан, ўзининг локаторларга қарши ускуналари билан THAAD радарларининг сигналларини тўсиб қўйишга қарор қилди, деб ёзмоқда South China Morning Post нашри. 

Аввалроқ, АҚШ Жанубий Кореяда ракета ҳужумларига қарши THAAD мажмуаларини жойлаштиришни бошлагани ҳақида хабар қилган эдик. 

Хитой халқ озодлик армияси генерали Ван Хунгуаннинг сўзларига кўра, Хитой Жанубий Корея янги президентини сайлаб олишини кутмайди. Чунки, Пекин маъмурияти расмий Сеул янги раҳбарияти ҳам бу борадаги сиёсатни ўзгартиришига ишонмайди. Шунга кўра, генералнинг сўзларига кўра, Пекин THAAD радарларининг сигналларини тўсиш чораларини кўради. 

"Биз ускуналаримизни THAAD ишга туширилишидан аввалроқ ўрнатиб бўламиз. Бунинг учун икки ой кутиш керак эмас", — деган Ван Хунгуан газетага берган интервьюсида. 

"Бизнинг бундай қурилмамиз бор, фақат унинг жойини керакли ҳудудга ўзгартиришимиз керак", — деган генерал. 

Шу билан бирга, Хитой армияси истеъфодаги полковниги Юэ Гэннинг айтишича, Хитой электромагнит технологиялардан фойдаланган ҳолда THAAD тизимларининг ишлашига тўсқинлик қила олади. Бунинг учун, шундай ускуналарни Корея ярим оролининг қаршисида жойлашган Шаньдун ярим оролига жойлаштириш кифоядир.