Сурия масаласини тартибга солиш бўйича янги учрашув Остонада 14—15 март кунлари ўтказилмоқда. Айни вақтда Қозоғистон пойтахтига Туркия, Эрон ва АҚШ делегациялари етиб келган.

"Туркия ва Эрон Ташқи ишлар вазирликларининг делегациялари келди, Россия Федерацияси президенти махсус вакили ва Россия ТИВнинг махсус вакили ҳам шу ерда", дея маълумот берган Қозоғистон ТИВ раҳбари Қайрат Абдрахманов.

Қозоғистон ТИВ матбуот хизмати раҳбари Ануар Жайнаковнинг маълум қилишича, АҚШ номидан музокараларда элчи Жорж Крол ҳамда Вашингтондан келган вакиллар иштирок этади. Шунингдек, Иорданиядан вакиллар келишган.

Учрашувнинг биринчи куни дастлабки маслаҳатлашувлар, иккинчи куни эса ялпи мажлис ўтказилиши кутилмоқда.

Кайрат Абдрахмановнинг маълум қилишича, Остонадаги учрашувда асирларни алмашиш бўйича ишчи гуруҳ тузиш масаласи муҳокама этилади.

"Кафолатловчи давлатлар маълумотига кўра, муҳокама қилинадиган масалалар қаторида ҳарбий асрларни алмашиш бўйича ишчи гуруҳ тузиш масаласи ҳам бор. Шунингдек, гуманитар объектларни миналардан холи қилиш ва бошқа ҳарбий масалалар муҳокама этилади", деган у.

Эслатиб ўтамиз, Сурия масаласи бўйича аввалги музокаралар 23 январь куни Остонада бўлиб ўтган эди.