Туркия Нидерландия билан муносабатларда юзага келган дипломатик можаро туфайли бирданига БМТ, ЕХҲТ ва Европа Кенгашига шикоят қилмоқчи. Бу ҳақда дипломатик манбаларига таянган ҳолда Hürriyet Daily News хабар тарқатди.

Манба маълумотига кўра, Туркия ушбу халқаро институтларга Нидерландия Вена конвенциясининг дипломатик муносабатлар тўғрисидаги бандларини бузгани юзасидан мурожаат қилмоқчи.

Туркия президенти Ражаб Тойиб Эрдўған Нидерландия билан можаролар туфайли Инсон ҳуқуқлари бўйича Европа судига юзланмоқчилигини билдирганди. Кейинроқ Туркия Нидерландияга иккита ҳолат бўйича нота йўллади. Туркиянинг Европа Иттифоқи бўйича ишлар вазири Умар Челик Нидерландияга нисбатан санкциялар қўлланиши шубҳасиз эканини маълум қилди.

Эслатиб ўтамиз, 11 март куни нидерландлар турклар делегацияси самолётига қўнишга рухсат бермагач  Туркия ва Нидерландия ўртасидаги дипломатик можаро юзага келди. ТИВ раҳбари Мавлуд Човушўғли бошчилигидаги Туркия делегацияси Нидерландиянинг Роттердам шаҳрида турк жамияти қаршисида конституцияга киритилиши режалаштирилган ўзгартиришлар ҳақида нутқ қилмоқчи эди. Нидерландия ҳукумати эса хавфсизлик нуқтаи назаридан унинг мамлакатга киришини тақиқлади.