Бельгиянинг миграция масалалари бўйича давлат котиби Тео Франкен Туркиядан бўлган 12 нафар имомга узоқ муддатли виза беришни рад қилди. Dernière Heure хабарига кўра, бу имомлар мамлакатдаги бир қатор давлат масжидларида ваъз қилишни режалаштирганди.

Маълум қилинишича, улар Намюр, Билзен ва Гентда ваъз қилмоқчи бўлган.

12 имомдан 10 нафари ҳукумат қарорига шикоят қилган. Бу шикоятлардан 4таси рад этиб бўлинди. Хорижликлар билан муаммоларни ҳал қилиш кенгаши бу ҳолатда дин эркинлигига зид ҳеч нарса қайд этмаган. Чунки, бу имомлар Бельгия чегараларидан ташқарида бўлиб, Бельгия ҳукумати юрисдикцияси остида эмас.

Бундан олдинроқ расмий Анқара Нидерландия элчисининг Туркияга киришини тақиқлаган ва икки давлат ўртасидаги барча олий даражадаги учрашувларни бекор қилганди.

Туркия президенти Ражаб Тойиб Эрдўған Нидерландия билан ўртадаги дипломатик можарони узр сўраш билан ҳал қилиб бўлмаслигини билдирди.