Канадада кучли қор ёғиши кутилмоқда. Об-ҳаво мутахассисларининг прогнозларига кўра, мамлакатнинг шарқий вилоятлари Онтарио, Квебек ва Нью-Брансуикда бир суткада 50 сантиметргача қор ёғиши мумкин.

Айни вақтда ёмон об-ҳаво шароитидан Онтарио вилоятининг жанубий қисми, Торонто ва пойтахт Оттава шаҳарлари аҳолиси кўпроқ азият чекмоқда. Миллий метеорологик бюро бу ерларда яқин соатларда 30 сантиметргача қор ёғишини прогноз қилмоқда. Шунингдек, 21 градуслик совуқ ҳарорат қайд қилинган.  

Торонтодаги Пирсон аэропортида 500 дан кўпроқ рейс бекор қилинган. Оттава ва Канада шарқидаги бошқа шаҳарларда юзлаб рейслар номаълум муддатга қолдирилган ёки бекор қилинган.  

Мамлакатнинг автомобиль йўлларида ҳам кўплаб йўл-транспорт ҳодисалари содир бўлмоқда. Кингстон яқинида кўплаб машиналар иштирокида юз берган автоҳалокатга тушган юк машиналаридан биридан атроф-муҳитга заҳарли моддалар сизиб чиққан.