Бугун кечаси Россия ҳудудига ноқонуний кириш ҳаракатининг олди олинди. Бу ишни Ўзбекистондан бўлган мигрант амалга оширмоқчи, деб хабар берди Қалмиқистон республикаси ва Астрахань вилояти бўйича чегара бошқармаси матбуот хизмати.

Ўзбекистоннинг 34 ёшли фуқароси Оқсарой бекатида чегара назоратидан ўтмаслик учун, Тошкентдан Волгоградга қараб ҳаракатланаётган поезд вагонидан сакраган ва вилоят марказига билдирмасдан етиб олишга уринган. Қидирув тадбирлари давомида у ушланган.

Шуни таъкидлаб ўтиш жоизки, 2015 йилда ҳам эркак бундай "трюк" учун 7 ойга озодликдан маҳрум этилган. Эндиликда сакрашни ёқтирадиган рецидивист 4 йилга озодликдан маҳрум этилиши мумкин.