«Манчестер Сити» Чемпионлар лигасининг 1/8 финали жавоб беллашувида «Монако»га имкониятни бой берди (1:3). Англияликлар илк баҳсда 5:3 ҳисобида зафар қучганди. Шу тариқа, «Манчестер Сити» мусобақани тарк этди, «Монако» эса чорак финалга йўл олди.

«Манчестер Сити» Чемпионлар лигаси тарихида икки беллашувлик қарама-қаршиликнинг биринчисида бешта тўп киритган, бироқ жавоб учрашуви якунига кўра кейинги босқичга чиқа олмаган биринчи клубга айланди.

Шунингдек англияликлар Чемпионлар лигасида икки учрашувда умумий ҳисобда олтита гол киритган, аммо турнирнинг кейинги раундига чиқа олмаган биринчи жамоа бўлди.