АҚШ президенти Дональд Трамп Оқ уйда бўлиб ўтган учрашувдан сўнгги суратга тушиш жараёнида Германия канцлери Ангела Меркель билан қайта кўришмади, деб ёзмоқда Politico нашри.

Музокаралардан сўнг, икки мамлакат етакчилари Овал хонада фотосуратчиларга киришга рухсат беришди. Журналистлар улардан кўришишни сўрашди, бироқ Америка раҳбари илтимосга эътибор бермади. Меркель ҳамкасбига бироз эгилиб, қайта кўришишни сўради, аммо Трамп бу сафар унинг таклифини жавобсиз қолдирди. 

Икки мамлакат раҳбарлари музокаралар аввалида, президент Трамп Меркелни Оқ уй қаршисида кутиб олганида кўришишган эди. 

Қатор ОАВ Трамп Овал хонадаги шовқинда Меркелнинг таклифини эшитмай қолган бўлиши мумкинлигини инкор этишмаяпти. Айримлари у Германия канцлерининг қўлини ушлашни "хоҳламаган"и ҳақида ёзмоқда. 

Айтиш жоизки, февраль ойида АҚШ президентининг Япония бош вазири Синдзо Абэ билан шу каби суратга тушиш жараёнида бунинг акси бўлганди. Ўшанда Трамп Абэнинг қўлини 20 сониялар ушлаб турган эди.