Жанубий Африка Республикаси БМТ Хавфсизлик кенгашидан Эронга Umkhonto зенит ракеталарини сотишга рухсат беришни сўради, деб хабар бермоқда Эроннинг Tasnim ахборот агентлиги. 

Ахборот агентлиги маълумотларига кўра, агар бундай рухсат берилса, унда бу ЖАРнинг  Denel Dynamics компаниясининг энг йирик битими бўлади. Шартнома қиймати 118 млн долларга баҳоланмоқда. 2016 йилнинг декабрида Эрон мудофаа вазири Ҳусайн Деҳқон ва ЖАР мудофаа вазири Носививе Маписа-Нкакула ҳарбий соҳада ҳамфикрлик меморандумини имзолашганди.

Ўтган йил январда Эрон ядровий дастури бўйича келишув амалга оширилиши бошлангандан кейин Эрондан халқаро санкциялар олинганди. Бироқ Эронга нисбатан ҳарбий-техник ҳамкорлик соҳасида бир қатор чекловлар сақланиб қолмоқда. Эронга ҳужумкор қурол турларини, жумладан, ҳарбий самолётлар, зарба берувчи вертолётлар, ҳарбий-денгиз кемалари, артиллерия қурилмалари, танк ва ракеталарни етказиб бериш учун БМТ Хавфсизлик кенгаши рухсати талаб этилади.