Sankt-Peterburgning shimolida joylashgan Shushar posyolkasida ishlovchi o‘zbekistonlik bilan ko‘ngilsizlik yuz berdi. Uning so‘zlariga ko‘ra, hujjatlarni tekshirishga kelgan huquq-tartibot xodimlari uning qo‘llarini qayirishadi va pasportiga haqoratli so‘z yozishadi. Endi u o‘z pasportini almashtirishga majbur bo‘lmoqda. Mazkur ishdan xabardor bo‘lgan deputatning ma'lum qilishicha, aybdorlar, albatta, jazolanishadi.
Voqea 14 mart kuni sodir bo‘lgan. Huquq-tartibot xodimlari libosidagi kishilar Shushardagi mehnat muhojirlarining hujjatlarini tekshirishgan. Muhojirlarning barcha hujjatlari joyida, ular Rossiya hududida mutlaqo qonuniy ravishda ishlashayotgan bo‘lgan.
Ammo shunga qaramay huquq-tartibot xodimlari ularni turli mashqlar bajarishga majbur qilishgan, qo‘llarini qayirishgan va pul talab etishgan. Muhojirlar ularga pul berishni rad etgan. Shunda tekshiruvchilar muhojirlardan birining pasportini tortib olgan va unga haqoratli so‘z yozgan.
Mazkur voqeadan jabrlangan o‘zbekistonlik o‘zining sobiq rahbariga murojaat qilgan. U esa, o‘z navbatida, deputat Artem Galisinga bo‘lgan voqeani aytib bergan. Deputat esa bo‘lib o‘tgan ishlarni ijtimoiy tarmoqdagi o‘z sahifasida batafsil yoritgan.
Ma'lumotlarga ko‘ra, ayni damda mazkur voqea yuzasidan Tergov qo‘mitasi tekshiruv ishlari boshlab yuborilgan.
