Президент Шавкат Мирзиёев томонидан қабул қилинган 2017-2021 йилларга мўлжалланган Ҳаракатлар стратегиясида ижтимоий масалаларни ривожлантиришга катта ўрин берилган.

Бу барча шаҳар ва туманлар ҳокимларининг ижтимоий масалалар билан шуғулланувчи ўринбосарлари зиммасига катта масъулият юклайди. Шу муносабат билан фаоллиги, ташаббускорлигини ошириш мақсадида уларга Ўзбекистон Республикаси Президенти томонидан хизмат машиналари ажратилди.

Сирдарё вилояти ҳокимлиги ахборот хизматининг маълум қилишича, Наврўз умумхалқ байрами тантаналари доирасида туманлар ва шаҳарлар ҳокимларининг ижтимоий масалалар билан шуғулланувчи ўринбосарларига “Нексия” хизмат машиналарини топшириш маросими бўлиб ўтган.

Вилоят ҳокими Ғофуржон Мирзаев хизмат машиналари калитларини тантанали равишда топширар экан, соҳа мутахассислари ишларига ривож ва омад тилаган.