Россия ва Эрон президентлари Владимир Путин ва Ҳасан Руҳоний 28 март куни Кремлда ўтган музокаралар якунларига кўра қўшма баёнот қабул қилишди. Бу ҳақда Путин ва Руҳоний иштирокида икки томонлама ҳужжатларни имзолаш маросимида эълон қилинди. Томонлар турли соҳаларда ҳамкорлик қилиш бўйича 16 та ҳужжат имзолашди. 

Хусусан, "Росатом" давлат корпорацияси ва Эрон атом энергия ташкилоти билан ядровий моддаларни ташиш соҳасида ҳамфикрлик меморандуми имзоланди. Шунингдек, ёнилғи-энергетика мажмуаси бўйича "Газпром" ва Эрон миллий нефть компанияси ўртасида газ соҳасида ҳамкорлик қилиш бўйича ҳамфикрлик меморандуми ва махфийлик ҳақида келишув, "Росгеология" ва Эрон миллий нефть компанияси ўртасида ҳамфикрлик меморандуми, Россия ва Эрон энергетика вазирликлари ўртасида электр энергияни сотиш соҳасида ҳамкорлик қилиш ҳақидаги ҳамфикрлик меморандуми имзоланди.

Томонлар, шунингдек, РЖД ва "Эрон Ислом Республикаси темир йўллари" ўртасида темир йўлларини электрлаштириш бўйича стратегик ҳамкорлик меморандумини ҳамда Гармсар - Инче Бурун темир йўл қисмининг электрлаштирилиши ва Россия қурилмалари ҳамда локомотивларини етказиб бериш бўйича шартнома имзолашди

Бу ҳужжатлардан ташқари, Россия ва Эрон фуқароларининг визасиз сайёҳлик гуруҳлари сафарлари ҳақида келишув, икки давлатнинг спорт вазирликлари ўртасида жисмоний тарбия ва спорт соҳасида ҳамкорлик ҳақидаги меморандум, қурилиш ва уй-жой-коммунал хўжалиги соҳаларида ҳамкорлик ҳақидаги меморандум имзоланди.

Бундан ташқари, Россиянинг аккредитациялаш федерал хизмати ва Эроннинг аккредитациялаш миллий маркази ўртасида ҳамфикрлик меморандуми, икки давлатнинг тегишли вазирликлари ўртасида алоқа ва ахборот технологиялари соҳасида ҳамкорлик қилиш ҳақидаги ҳамфикрлик меморандуми ҳамда "Росконгресс" жамғармаси ва Эрон савдо-саноат палатаси ўртасида ҳамкорлик ҳақидаги келишув имзоланди.