АҚШ президенти Дональд Трампнинг куёви ҳамда маслаҳатчиси Жаред Кушнер Оқ уй маъмурияти ҳузурида янги ташкил этилган инновациялар бўйича идорага раҳбарлик қиладиган бўлди. Бу ҳақда АҚШ президенти матбуот котиби Шон Спайсер журналистларга маълум қилган.

"Америка инновациялари бўйича идора ҳукумат амалиётлари ва хизматларини белгиланган муддатдан тезроқ ва арзонроқ амалга ошириш ишлари билан шуғулланади", — дея изоҳ берган Спайсер.

Хусусан, Кушнер вазирликлар ва идоралардаги технологияларни модернизация қилиш билан шуғулланади. Спайсер, шунингдек, фахрийлар ишлари бўйича вазирлик фаолиятининг самарадорлигини ошириш заруратига алоҳида тўхталган.