Абу-Даби федерал апелляция суди БАА фуқаросини ўз давлати ва унинг миллий рамзларини интернетда ҳақорат қилгани учун 10 йиллик қамоқ жазосига маҳкум қилди, деб хабар бермоқда Gulf News нашри.

Шунингдек, айбланувчи "Мусулмон биродарлар" террорчилик ташкилоти билан боғлиқ "Ал-Ислоҳ" ҳаракати билан алоқа қўллаб-қувватлашда айбдор деб топилган. 

Айбланувчи интернетда БААнинг ташқи сиёсати ва давлат рамзлари ҳақорат қилинган суратлар ва мақолалар чоп этилган аккаунтлар ва веб-сайтлар яратган.

29 март куни суд БААнинг яна бир фуқаросини БААда сиёсий партия ташкил қилиш ва давлат тўнтаруви амалга ошириш чақириғи учун 10 йиллик қамоқ жазоси ва 3 млн долларлик жаримага сиртдан маҳкум қилди. Айбланувчи ўз сайтлари ва ижтимоий тармоқлардаги аккаунтларида ўз "сиёсий партиясини" илгари сурувчи ва БААни ҳақоратловчи мақолалар жойлаштирган.

БААнинг кибержиноятлар ҳақидаги қонунида умрбод озодликдан маҳрум қилишгача бўлган жазолар кўзда тутилган.