Маълумки, 2016 йил 28 декабрда қабул қилинган «Жисмоний ва юридик шахсларнинг мурожаатлари билан ишлаш тизимини тубдан такомиллаштиришга доир чора-тадбирлар тўғрисида»ги Ўзбекистон Республикаси Президенти фармони асосида бугунги кунда барча ҳудудларида Ўзбекистон Республикаси Президентининг Халқ қабулхоналари фаолият олиб бормоқда.

Бу борада Нукус шаҳридаги Халқ қабулхонасида ҳам фуқароларни қабул қилиш, мурожаатларни кўриб чиқиш ва сақлаш замонавий ахборот-технологиялари асосида ташкил этилган.

-Фермер хўжалигимизга техника сотиб олиш учун кредит маблағларини чиқаришда айрим қийинчиликларга учраган эдик, - дейди Нукус туманидаги «Азамат КАА» фермер хўжалиги иш юритувчиси Байрам Жуманиязов. –Ўзбекистон Республикаси Президентининг Нукус шаҳридаги Халқ қабулхонасига мурожаатимиздан сўнг 1 кун ичида кредит пулларини чиқариб беришди ва қишлоқ хўжалиги техникасини сотиб олиб, бугунги кунда баҳорги дала ишларига ишлатмоқдамиз.

-2011 йили олий таълим муассасини тамомлаб, 6 йилдан буён ишга жойлаша олмай келаётгандим, - дейди Нукус шаҳри, Қ.Тилеўмуратов кўчасида истиқомат қилувчи фуқаро Гулнара Берданова. – Президентимизнинг Нукус шаҳридаги Халқ қабулхонасига қилган мурожаатимдан сўнг 8 кунда «Савдогарбанк»нинг Нукус мини банкига ишга жойлашдим. 

Дарҳақиқат, бугунги кунда Халқ қабулхоналари том маънода инсонлар масала ва муаммоларини ҳал этишга хизмат қиладиган масканга айланди. Чунки, аҳоли муаммоларини шу куннинг, ҳозирнинг ўзида ҳал қилиш – давр талабидир.