«Matbuot» kiosklarining 700 ga yaqini to‘lov terminallari bilan ta'minlanmagani uchun yopib qo‘yildi

Milliy matbuot markazida «Matbuot tarqatuvchi» aksiyadorlik kompaniyasi tomonidan vaqtli matbuot nashrlarini aholiga tez va sifatli yetkazib berish bo‘yicha belgilangan chora-tadbirlar, muammo va yechimlarga bag‘ishlangan matbuot anjumani o‘tkazildi. Bu haqda O‘zA xabar bermoqda.

So‘nggi yillarda kompaniya faoliyatini yanada takomillashtirish, vaqtli matbuot nashrlarini iste'molchiga tez va sifatli yetkazib berish maqsadida qator ishlar amalga oshirildi. 

– Tizim korxonalaridagi mavjud «Matbuot» kiosklarining aksariyati joriy va kapital ta'mirlandi, – deydi «Matbuot tarqatuvchi» aksiyadorlik kompaniyasi bosh yurist-konsultanti Alisher Qosimov. – Marketing tadqiqotlariga asosan aholi gavjum joylarga 153 hamda poytaxtimizning markaziy ko‘chalariga yangi tipdagi 98 kiosk joylashtirildi. Avtomashinalar ta'mirlanib, 49 yangi avtotransport vositasi xarid qilindi. Joriy yil uchun obunani rasmiylashtirish va yetkazib berish xarajatlari bo‘yicha tariflar sezilarli darajada pasaytirildi, ba'zi nashrlar, xususan, ijtimoiy-siyosiy ahamiyatga ega va bolalar uchun nashrlarga imtiyozlar qo‘llanildi. 

Akmt.uz veb-saytida obuna katologining elektron ko‘rinishi joylashtirilgan bo‘lib, internet tarmog‘i orqali ham davriy nashrlarga obuna yo‘lga qo‘yilgan. Hozir mazkur xizmat turi yanada takomillashtirilmoqda. 

Shu bilan birga, qayd etilishicha, bugungi kunda «Matbuot» kiosklarining 700 ga yaqini to‘lov terminallari bilan ta'minlanmagani uchun yopib qo‘yilgan. Ularning aksariyatida yangi xizmat turlari, xususan, internet hamda xalqaro telefon so‘zlashuv kartalari, uyali aloqa telefonlariga to‘lov kartalari sotuvi, telefon-faks va nusxa ko‘paytirish xizmatlari yo‘lga qo‘yilmagan. 

Matbuot anjumanida ana shu singari kamchiliklar va ularni bartaraf etish borasida qilinayotgan ishlar haqida fikr yuritildi.