28 март – 1 апрель кунлари Андижон тиббиёт коллежида вилоят касб-ҳунар таълими бошқармаси тасарруфидаги академик лицей ва касб ҳунар коллежлари иккинчи ва учинчи курс ўқувчилари ўртасида умумтаълим фанлари бўйича Республика олимпиадасининг вилоят босқичи бўлиб ўтди.

Олимпиаданинг мазкур босқичида 14 та умумтаълим фанлари бўйича таълим муассасаларининг 579 нафар 3-курс ҳамда 575 нафар 2-курс ўқувчилари иштирок этдилар.

Билимлар беллашуви натижаларига кўра 28 нафар ўқувчилар ғолибликни қўлга киритиб, олимпиаданинг Республика босқичида қатнашиш ҳуқуқини қўлга киритди. Шунингдек, совринли ўринларни эгаллаган 16 нафар ўқувчи келгуси йили бўлиб ўтадиган олимпиаданинг вилоят босқичида тўғридан-тўғри иштирок этиш имкониятига эга бўлди.

Фанлар кесимида энг кўп натижани Андижон давлат университети қошидаги 4-сонли академик лицей (6 та ўрин), Андижон давлат университети қошидаги 3-сонли академик лицей (5 та ўрин), Андижон қишлоқ хўжалиги институти қошидаги 3-сонли ҳамда Андижон машинасозлик институти қошидаги 2-сонли академик лицейлар (2 тадан ўрин) ўқувчилари қўлга киритди.

Олимпиада ғолибларини тақдирлаш маросимида ғолиб ўқувчиларга махсус гувоҳномалар тантанали равишда топширилди.

Тадбирда ўрта махсус, касб-ҳунар таълими маркази масъул ходими А.Ғаниев, вилоят касб ҳунар таълими бошқармаси бошлиғи Ф. Бузруков ҳамда Ўзбекистон Қаҳрамони, Олтинкўл иқтисодиёт коллежи директори Ш.Маматқуловлар иштирок этдилар ва ғолиб ўқувчиларни эришган ютуқлари билан қизғин табрикладилар.

Kun.uz мухбири Элмурод Эрматов, Андижон