Америка Қўшма Штатлари томонидан раҳбарлигидаги халқаро коалиция 2014–2017 йилларда Ироқ ва Сурияда авиазарбалар натижасида камида 396 нафар фуқаронинг ўлимида айбдор эканлигини тан олган. Бу ҳақда уюшманинг баёнотида маълум қилинган, деб хабар беради РИА Новости.

Шунингдек, коалиция март ойида Мўсул шаҳрини бомбардимон қилишда 15 нафар тинч аҳоли вакилларининг, февраль ойида Ироқ ва Сурияда 5 нафар фуқаронинг ўлими ҳақидаги хабарлар ишончли эканлигини тасдиқлаган.

Март ойи сўнгида АҚШ армияси Ироқнинг Мўсул шаҳрида 200 га яқин тинч аҳоли вакилларининг ўлимига сабаб бўлган авиазарбалар айнан Америка авиацияси томонидан берилган ҳақиқатга яқин эканлигини таъкидлаган эди. «Агар биз ҳақиқатдан ҳам буни қилган бўлсак — шундай деб ҳисобламоқ учун барча асослар мавжуд — бу уруш вақтларида бехосдан йўл қўйиладиган тасодифдан бошқа нарса эмас», — деган Ироқ ва Сурияда ИШИД террорчилик гуруҳига қарши халқаро операцияларга қўмондонлик қилаётган генерал-лейтенант Стивен Таунсенд.

Мўсулнинг ғарбий қисмидаги операциялар халқаро коалиция авиацияси иштирокида олиб борилмоқда. Бироқ тинч аҳоли ўртасида қурбонлар сони ортиб бораётгани туфайли Ироқ ҳарбий кучлари 28 март куни жанговар ҳаракатларни вақтинча тўхтатишга қарор қилган эди. Айтилишича, Ироқ қўмондонлиги тинч аҳоли ўртасида қурбонларга йўл қўймай террорчиларга зарба бериш учун "янги ҳужум режалари ва тактикаларини ишлаб чиқиш"ни истамоқда.

Ироқ оммавий ахборот воситалари 17 март куни Мўсул бомбардимон қилиниши оқибатида 200 га яқин тинч аҳоли вакиллари қурбон бўлгани ҳақида хабарлар тарқатган эди. Чамаси, ИШИД халқаро террорчилик ташкилоти жангарилари позицияларига зарбани АҚШ ҳарбий ҳаво кучлари самолётлари берган. Пентагонда тинч фуқароларнинг ўлими юзасидан берилган хабарларни текшириб кўришган. 25 март куни идора Ироқ ҳукумати сўровига кўра шаҳарга зарба бергани, бироқ қурбонларга алоқадор эмаслигини билдираётган эди.