Жанубий Кореяга қарашли Stella Daisy юк кемаси бортида экипажнинг 22 аъзоси билан фалокат сигнали беришга улгурган ҳолда Атлантика океанида йўқолиб қолди.

Кемадаги 2 денгизчи солда сузиб кетаётганда Атлантика жанубида бу ҳудуддан ўтувчи тижорат кемалари томонидан аниқланган. Таъкидланишича, йўқолган кемада 24 киши  – 8 нафар жанубий кореялик ва 16 нафар филиппинлик денгизчилар бўлган. Экипажнинг 2 аъзоси солда бўлган. Айни вақтда қолган 22 денгизчининг тақдири номаълумлигича қолмоқда.     

Бортида 266 тонна руда билан кетаётган кема охирги марта 31 март куни Жанубий Американинг шарқий соҳиллари яқинида, Уругвай атрофларида ўзининг Polaris Shipping компанияси билан алоқага чиққан. Экипаж аъзолари кема чўкаётганини айтишган ва шундай кейин у билан алоқа йўқолган.

"Кема чўкиб кетган бўлиши мумкинлигини истисно қилмаяпмиз. Ҳозирда экипаж аъзолари хавфсизликда эканликларининг тасдиғи йўқ", деб маълум қилди Жанубий Корея мудофаа вазирлигидаги манба.  

Жанубий Корея ташқи ишлар вазирлиги дипломатик йўллар билан фалокат ҳақида маълум қилган. Кемани қидиришда бу ҳудудда бўлган тижорат кемалари ҳам иштирок этмоқда. Жанубий Корея ҳукумати кемани излашда ёрдам беришни сўраб Уругвай ва Бразилия ҳукуматларига мурожаат қилган.